ក្រសួង​សុខាភិបាល ប្រកាស​ស្វែងរក​អ្នកពាក់ព័ន្ធ​ជាមួយ​លោកស្រី ឈ្មោះ ឆែម សូនីតា និង​បុរសឈ្មោះ តាំង សេវិនអាប់ ដែល​សង្ស័យ​ជាប្រភពដំបូង​នៃ​ការឆ្លង​ចូលសហគមន៍

អត្ថបទៈ គង់ វណ្ណះ

ភ្នំពេញ៖ នៅថ្ងៃទី៥ ខែធ្នូ ឆ្នាំ២០២០ នេះ ក្រសួងសុខាភិបាល បានប្រកាសស្វែងរកអ្នកប៉ះពាល់ផ្ទាល់ជាមួយបុគ្គល ០២នាក់ គឺស្ត្រីឈ្មោះ ឆែម សូនីតា អាយុ ៣០ឆ្នាំ និងបុរសឈ្មោះ តាំង សេវិនអាប់ អាយុ ៤២ឆ្នាំ ដោយគិតចាប់ពីថ្ងៃទី១៤ ខែតុលា ឆ្នាំ២០២០ ដល់ថ្ងៃទី១៧ ខែ វិច្ឆិកា ឆ្នាំ២០២០ ទោះជាមិនមានរោគសញ្ញាក៏ដោយ ត្រូវមកធ្វើតេស្តដោយយកវត្ថុសំណាក និងពិនិត្យឈាម នៅតាមមន្ទីរពេទ្យខេត្តដែលលោកអ្នកស្នាក់នៅ។ នៅរាជធានីភ្នំពេញ សូមអញ្ជើញទៅធ្វើតេស្ត ដោយយកវត្ថុសំណាកនៅវិទ្យាស្ថានជាតិសុខភាពសាធារណៈ រាល់ម៉ោងធ្វើការ។

ក្រសួងសុខាភិបាល ក៏បានឱ្យដឹងទៀតថា ក្រោយពីក្រសួង បានចេញសេចក្តីប្រកាសព័ត៌មាន ស្តីពីការស្រាវជ្រាវរកប្រភពនៃការចម្លងវីរុសកូវីដ-១៩ ពាក់ព័ន្ធនឹងព្រឹត្តិការណ៍សហគមន៍ ២៨ វិច្ឆិកា នា ថ្ងៃទី០៣ ខែធ្នូ ឆ្នាំ២០២០ រួចមក, ក្រុមការងារអន្តរក្រសួងទទួលបន្ទុករុករកស្រាវជ្រាវរួមគ្នាជាមួយនឹងក្រុមការងាររបស់ក្រសួងសុខាភិបាល បានខិតខំធ្វើការស្រាវជ្រាវរកប្រភពនៃការចម្លងវីរុសកូវីដ-១៩ នេះ ជាបន្តទៀត។

តាមការពិភាក្សាក្នុងក្រុមការងារថ្នាក់ដឹកនាំក្រសួងសុខាភិបាល ក្រុមស្រាវជ្រាវចម្រុះនៃនាយកដ្ឋានប្រយុទ្ធនឹងជំងឺឆ្លង ជាមួយនឹងអ្នកជំនាញការអង្គការសុខភាពពិភពលោក និងវិទ្យាស្ថានប៉ាស្ទ័រកម្ពុជា នាព្រឹកថ្ងៃទី០៥ ខែធ្នូ ឆ្នាំ២០២០ និងដោយយោងតាមព័ត៌មានទទួលបានពីការធ្វើសម្ភាសន៍ផ្ទាល់ជាមួយករណីពាក់ព័ន្ធ ការសិក្សាអំពីដេមីសាស្ត្រ និងការសិក្សាផ្នែកមន្ទីរពិសោធន៍តាមបែបវិទ្យាសាស្ត្ររបស់វិទ្យាស្ថានប៉ាស្ទ័រកម្ពុជាលើប្រភេទវីរុសកូវីដ -១៩ ដែលអាចចម្លងមកពីក្រៅប្រទេស និងនៅក្នុងប្រទេសកម្ពុជា សម្រាប់ "ព្រឹត្តិការណ៍សហគមន៍ ២៨ វិច្ឆិកា", ក្រុមការងារអាចទាញការសន្និដ្ឋាន ជាបន្តទៀត ដោយផ្អែកលើ ៖

១. លំដាប់លំដោយនៃការចេញរោគសញ្ញា និងហេតុការណ៍សកម្មភាពទំនាក់ទំនងគ្នាក្នុងសង្គម

២. ការវិវត្តន៍នៃចំនួនមេរោគតាមបែបភីស៊ីអែរ (PCR Test)

៣. ទំនាក់ទំនងទទួលបានពីការវិភាគវត្ថុសំណាកអ្នកជំងឺបែបបំបែកបន្តៗគ្នា (Sequencing Covid-19 virus sample)

៤. តាមការពិចារណាដោយហ្មត់ចត់នៃអង្គបដិបក្ខ (Antibody) ដោយពិនិត្យលើវត្ថុសំណាកឈាមរបស់អ្នកជំងឺ។

លទ្ធផលនៃការពិភាក្សា ត្រូវបានបង្ហាញជូនដូចតទៅ៖បុគ្គល ២នាក់ គឺស្ត្រីឈ្មោះ ឆែម សុនីតា អាយុ ៣០ឆ្នាំ និង បុរសឈ្មោះ តាំង សេវិនអាប់ អាយុ ៤២ឆ្នាំ អាចឆ្លងវីរុសកូវីដ-១៩ មុនគេ និងជាករណីជាសះស្បើយក្រោយការបង្ករោគហើយ និងដែលអាចជាប្រភពទី១ នៃការចម្លងសម្រាប់ព្រឹត្តិការណ៍សហគមន៍ ២៨វិច្ឆិកា" ពីករណីនាំចូលមកកម្ពុជាក្នុងកំឡុងខែតុលា ឆ្នាំ២០២០។ បុគ្គល ០៧នាក់ (ស្រ្តីឈ្មោះ ហេង គង់ អាយុ ៥៦ឆ្នាំ, បុរសឈ្មោះ ឆែម សាវុធ អាយុ ៥៧ឆ្នាំ, កុមារាឈ្មោះ កែវ រតនៈបញ្ញា អាយុ ១២ឆ្នាំ, ស្ត្រីឈ្មោះ លឹម លម្អ អាយុ ២៤ឆ្នាំ, ស្រ្តីឈ្មោះ អ៊ីវ ប៊ុនសូលីដា អាយុ ៣៦ឆ្នាំ , បុរសឈ្មោះ អែមសាន អាយុ ៣៦ឆ្នាំ និងបុរសឈ្មោះ សេង ឆាយា អាយុ ៣0ឆ្នាំ កំពុងមានជំងឺស្ថិតក្នុងដំណាក់កាលកណ្តាល ឆ្ពោះទៅរកការជាសះស្បើយ។

បុគ្គល ០៤នាក់ (ស្រ្តីឈ្មោះ ឆែម សុភាព អាយុ ៣៦ឆ្នាំ, ស្ត្រីឈ្មោះ អ៊ុ សុវណ្ណារ៉ា អាយុ ៦៤ឆ្នាំ ស្ត្រីឈ្មោះ សេងលីន អាយុ ២១ឆ្នាំ និងបុរសឈ្មោះ ឡាយ សេងលី អាយុ ២៣ឆ្នាំ) កំពុងមានជំងឺក្នុងដំណាក់កាលដំបូងនៃការឆ្លងរោគ។ បុគ្គល ០៤នាក់ (បុរសឈ្មោះ លឹម ស្នែគំនិត អាយុ ៣១ឆ្នាំ, បុរសឈ្មោះ អេង ហាក់សេង អាយុ ៣២ឆ្នាំ ស្ត្រីឈ្មោះ អេង គឹមហៀក អាយុ ៥៦ឆ្នាំ និងបុរសឈ្មោះ ស៊ឹម សុផាន់ណារ៉ាត់ អាយុ ៣៩ ឆ្នាំ) អាចមិនឆ្លង ឬក៏កំពុងស្ថិតនៅក្នុងដំណាក់កាលមេរោគសម្ងំនៅឡើយ (Incubation period) ដោយរកមិនឃើញអង្គបដិបក្ខ (Antibody) និងមិនទាន់ឃើញមានវីរុសកូវីដ-១៩ (ដែលត្រូវរង់ចាំពិនិត្យតេស្តលើកទីពីរទៀត)។

ការរៀបរាប់ខាងលើ គឺជាសម្មតិកម្ម ដែលក្រុមការងារទទួលបានពីកិច្ចពិភាក្សានៅថ្ងៃទី០៥ ខែធ្នូ ឆ្នាំ២០២០ ដែលបានបង្ហាញថា មានបុគ្គល ២នាក់ (គឺស្ត្រីឈ្មោះ ឆែម សូនីតា អាយុ ៣០ឆ្នាំ និងបុរសឈ្មោះ តាំង សេវិនអាប់ អាយុ ៤២ឆ្នាំ) ជាករណីឆ្លងដំបូងគេនៃ"ព្រឹត្តិការណ៍សហគមន៍ ២៨វិច្ឆិកា” ដែលពួកគាត់អាចឆ្លងបន្តពីករណីនាំចូលវីរុសកូវីដ-១៩ ពីក្រៅប្រទេស។

ក្រសួងសុខាភិបាល បានឱ្យដឹងបន្ថែមថា វិធានការ និងទិសដៅបន្ទាប់ ដើម្បីទប់ស្កាត់ការចម្លងក្នុងសហគមន៍ទ្រង់ទ្រាយធំ សូមប្រជាពលរដ្ឋទាំងអស់ ចូលរួមអនុវត្តវិធានការសុខាភិបាល តាមការអំពាវនាវរបស់រាជរដ្ឋាភិបាលកម្ពុជា និងរបស់ក្រសួងសុខាភិបាល ដែលបានណែនាំរួចហើយ ឲ្យបានហ្មត់ចត់ជាទីបំផុត។ ក្រុមការងារចម្រុះ នឹងបន្តការស្រាវជ្រាវរុរកជាប្រភពចម្លង និងការពាក់ព័ន្ធទៅនឹងព្រឹត្តិការណ៍សហគមន៍ ២៨ វិច្ឆិកាជាបន្តទៀត។

សូមបញ្ជាក់ថា បើមានបញ្ហាសុខភាព ឬសង្ស័យករណីជំងឺកូវីដ-១៩ សូមហៅទៅលេខទូរស័ព្ទទាន់ហេតុការណ៍ ១១៥ ដោយឥតគិតថ្លៃ ឬទូរស័ព្ទលេខ ៖ ០១២ ៨២៥ ៤២៨ ឬ ០១២ ៨៨៨ ៩៨១ ឬ ០១២ ៨៣៦ ៨៦៨៕

You can share this !

Loading...
អត្ថបទទាក់ទង